Përshkrimi që i bën Salinger – i Holden Kolfilldit mbahet si një nga portretet më bindëse të adoleshentit në letërsinë botërore. I zgjuar, i ndjeshëm dhe me imagjinatë të ndezur, Holdeni lakmon pranimin në botën e të rriturve edhe pse përndiqet nga ajo që e konsideron si "hipokrizi", duke përfshirë këtu mësuesit e tij, prindërit dhe vëllanë më të madh.Holdeni është idealist deri në dhembje dhe ka vendosur të jetë i moralshëm në jetë. Ai i tregon së motrës se ka vendosur të jetë një "fëmijë mbi humnerë", mbrojtës i fëmijërisë së pafajshme, dhe se kërkon të qëndrojë në atë pjesë të humnerës ku luajnë qindra fëmijë dhe "të shpëtojë ndonjë prej tyre nëse bie poshtë".