Historia e vërtetë përzihet me historinë e trilluar të Oskarit, personazhit kryesor të librit. Që në krye të librit, tregimtari i romanit na njeh me Fukú americanus-in ose me atë që quhet thjesht fukú. Fukú-ja është një mallkim i përhapur me ardhjen e europianëve në ishull, dhe ajo, sipas rrëfimtarit, ishte "e vërtetë si dreqi" dhe se Rafael Leonidas Trujillo, diktatori domenikan, kishte lidhje të drejtpërdrejtë me të. Jeta në Santo-Domingon e Trujillos kishte kosto dhe asnjeri nuk mund ta ndryshonte këtë. Kushdo që fliste kundër Trujillos e ndiqte pas një fukú e tmerrshme. Bashkëpunimi ndërmjet tij dhe fukú-së, ishte i pashmangshëm. Pikërisht një fukú i ndodhi gjyshit të Oskarit dhe e ndoqi familjen e tij për tre gjenerata me rradhë. "Mallkimi fukú" trajton në mënyrë të hollësishme historinë e vendit dhe jetës së Oskarit, djalit obez, rritur në Paterson, Nju-Xhersi, që ishtë i fiksuar pas romaneve fantastiko-shkencorë dhe të dashurave. Ai ishte një djalë i ëmbël, i dashur, me dellin shkatërrimtar të një vetmie të zgjedhur, një romantik që ëndërronte të bëhej shkrimtar dhe, mbi të gjitha, të gjente dashurinë. Por, asnjëherë nuk mori atë që donte, për shkak të kësaj fukú-je: mallkimit që kishte rënë mbi breza të tërë të familjes së tij, duke i ndjekur ata në emigrime epike drejt Shteteve të Bashkuara dhe sërish përgjatë kthimit në atdhe.